蘋果新聞 Apple Daily – 中環在線：鑽石盛男3萬銀搵真愛

前排一套《盛女愛作戰》令人以為香港多剩女，查實剩男與「盛男」都唔少！星洲相睇公司Lunch Actually（LA）老闆林笑岏睇中香港有好多鑽石盛男，於是走嚟做生意，專幫一班身家過百萬美金嘅盛男搵另一半。盛女生意都做，但年齡上限35歲。鑽石盛男搵另一半當然有要求，除咗基本嘅樣靚身材正、讀過番書之外，仲要求女方閒時讀《經濟學人》，嫁咗之後要做全職少奶，即師奶。
要求咁高，收費都有番咁上下，LA推出三個套餐，由3萬到最貴12萬，除咗周圍物色女仔，仲會提供形象指導、約會課程，等盛男魅力大增。

袋住《經濟學人》有着數

雖然公司叫Lunch Actually，但相睇方法唔一定食晏，總之係食飯，林笑岏一個月前已經喺新加坡推出同類套餐，仲有幾個盛男客仔喺手，當中有當地上市公司CEO。